Kulingana na kumbukumbu ya maandishi kwenye tovuti rasmi ya Tume ya Taifa ya Maendeleo na Mageuzi, Li Chao, naibu mkurugenzi wa Idara ya Utafiti wa Sera ya Tume hiyo, alisema katika mkutano wa kawaida wa waandishi wa habari wa Tume wa mwezi wa 8 uliofanyika leo kwamba sekta ya roboti inahusisha teknolojia nyingi za kisasa, zikiwemo akili bandia, utengenezaji wa hali ya juu na vifaa vipya. Ni lazima sekta hiyo iendelezwe kwa kuzingatia hali za eneo na kwa afya na utaratibu, kwa kutegemea rasilimali na uwezo wa viwanda wa eneo husika, kubainisha mwelekeo sahihi na kutumia faida zilizopo, ili kuzuia kufuata mkumbo na kuwekeza kiholela, na kuhakikisha maendeleo ya sekta husika ni endelevu na thabiti.
Hatua inayofuata, Tume ya Taifa ya Maendeleo na Mageuzi itazingatia uhalisia, matumizi na utekelezaji wenye matokeo, ikitumia vituo vya mafunzo ya akili yenye mwili na vituo vya majaribio ya matumizi kama msingi, ili roboti ziboreshe teknolojia katika mazingira halisi na kuunda mzunguko kamili wa matumizi unaozingatia mahitaji halisi.
Kwa upande mmoja, kutakuwa na mpangilio wa jumla wa vituo vya mafunzo ya akili yenye mwili, huku usambazaji wa data, miundo na viwango ukiimarishwa.
Kwa upande wa data, kutajengwa mfumo wa kukusanya data bora kutoka kwa mashine halisi, ili kuongeza ubora na ukubwa wa usambazaji wa data ya akili yenye mwili na kutatua tatizo la “njaa ya data” katika mafunzo ya akili yenye mwili.
Kwa upande wa miundo, kwa kutegemea data bora na mazingira halisi, kampuni za miundo ya akili yenye mwili zitawezeshwa kuchunguza njia mbalimbali za kiteknolojia. Ubunifu katika mwelekeo wa kisasa kama miundo ya kuona — lugha — kitendo na miundo ya dunia utahimizwa, ili kuharakisha ukomavu wa teknolojia na utekelezaji wa matumizi.
Kwa upande wa viwango, ujenzi wa mfumo wa viwango vya teknolojia ya akili yenye mwili utasukumwa, ili viwango vilivyounganishwa vipunguze gharama za kuoanisha miundo na miili mbalimbali na kukuza ujenzi na matumizi ya pamoja ya teknolojia.
Kwa upande mwingine, kituo cha kitaifa cha majaribio ya matumizi ya akili bandia katika mwelekeo wa akili yenye mwili kitajengwa na kutumiwa vizuri, ili kuharakisha utekelezaji wa matumizi na upanuzi wa ukubwa wa sekta.
Kwa upande wa utekelezaji wa matumizi, maktaba ya mazingira ya mafunzo ya akili yenye mwili itapanuliwa. Kampuni zinazohusika katika sekta mbalimbali zitahimizwa kufungua mazingira halisi, huku kampuni za akili yenye mwili zikiwezeshwa kufanya majaribio ya kutegemewa na usalama, ili kuharakisha matumizi halisi ya akili yenye mwili katika maeneo ya utengenezaji, matibabu, matumizi ya bidhaa, huduma na usalama wa umma.
Kwa upande wa upanuzi wa ukubwa wa sekta, kwa kutegemea kituo cha majaribio, uunganishaji wa kampuni za mashine kamili, vifaa saidizi na mazingira ya matumizi utasukumwa, ili kusaidia biashara ndogo na za kati kuvuka kizingiti cha uthibitishaji cha “kutoka mfano wa mashine hadi uzalishaji wa kiwango kikubwa” na kuunda mfumo mzuri wa viwanda unaowezesha maendeleo jumuishi ya aina mbalimbali za kampuni.