Mashindano ya pili ya Dunia ya Roboti Wenye Umbo la Binadamu yalianza tarehe 22 Agosti katika Ukumbi wa Kitaifa wa Kuteleza kwa Kasi. Katika fainali ya mbio za mita 400 (kundi dogo), Tiangong aliyemaliza mbio kwa mtindo wa “kukimbia akifunika uso” alishinda kwa muda wa sekunde 45.66.
Kulingana na ripoti ya Hongxing Capital Bureau, baada ya mashindano, Han Gang, kiongozi wa timu ya utafiti na maendeleo ya kundi dogo la mita 400 la Tiangong Omni na mtaalamu wa algoriti za udhibiti wa mwendo katika Kituo cha Ubunifu wa Roboti Wenye Umbo la Binadamu cha Beijing, alisema katika mahojiano kwamba hawakumtafutia “msichana mdogo” wa kuiga mtindo wa kukimbia; yote hayo yalibuniwa na Tiangong Omni yenyewe kupitia “ufikiri” wake.
“Mwanzoni tulibuni mfumo wa kawaida wa mtu kukimbia mita 100, lakini roboti hii iliendelezwa kupitia marudio ya data yaliyofanywa kila mara katika mazingira ya uigaji. Ilipokuwa ikijifunza, huenda ilihisi kwamba ‘kukimbia ikifunika uso’ kulikuwa na raha zaidi kuliko kukimbia ikipeleka mikono mbele na nyuma, kwa hiyo huu ni mtindo iliojibunia kupitia marudio yake yenyewe.” Kwa maneno mengine, roboti yenyewe iliamua kukimbia hivyo.
Tiangong Omni ina urefu wa 1.35m na uzito wa 39kg, na ina uwezo fulani wa kubeba mizigo. Imeundwa kwa ajili ya matumizi ya baadaye katika maeneo kama nafasi finyu, uokoaji wa dharura na huduma za nyumbani. Jambo la kuzingatia ni kwamba imefungua mfumo wa uendelezaji wa programu za ziada, pamoja na API za viungio, vihisi, mfumo na udhibiti wa mwendo, ili kupunguza vizingiti na gharama za utafiti na maendeleo ya kiwango cha chini kwa watengenezaji na kuharakisha ubunifu na marudio ya programu.