Kulingana na ripoti ya CCTV International News, wakati wa msimu wa mitihani wa msimu huu wa joto, kesi za udanganyifu wa AI ziliongezeka kwa kiasi kikubwa katika shule nyingi za sekondari nchini Denmark. Akili bandia zalishi (AI) inapoingia shuleni, matumizi yake na wanafunzi kukamilisha kazi za nyumbani na hata kudanganya katika mitihani yameleta changamoto mpya kwa elimu na mifumo ya jadi ya mitihani.
Kwa sababu hiyo, serikali ya Denmark hivi karibuni ilizindua mpango wa dharura wa kudhibiti udanganyifu wa AI kwa kuongeza mahojiano ya mdomo na kufuatilia skrini za kompyuta za wanafunzi wakati wa mitihani. Kwa mujibu wa mpango huo, takriban wanafunzi 9000 kila mwaka watahitajika, pamoja na kukamilisha kazi za kitaaluma zilizoandikwa, kushiriki pia katika mahojiano ya mdomo. Serikali pia imetoa wito wa kufuatilia skrini za kompyuta za wanafunzi wakati wa mitihani ya maandishi na kutumia uchujaji wa mtandao kuzuia ufikiaji wa maudhui ambayo hayajaidhinishwa. Aidha, serikali inawahimiza wanafunzi kukamilisha kazi za maandishi katika mazingira yanayodhibitiwa shuleni.
Ingawa matumizi ya AI kwa "udanganyifu" yameleta changamoto kwa shule, shule zenyewe pamoja na wanafunzi na wazazi bado wanaamini kwamba AI haiwezi tu "kufukuzwa shuleni". Badala yake, wanapaswa kutafuta njia zinazofaa zaidi za kuitumia.
Mapema mwaka huu, vyuo vikuu nchini Australia pia vilianza kuharakisha marekebisho ya mitindo ya mitihani na tathmini ili kulinda uaminifu wa shahada na kuanza tena kutumia mitihani ya mdomo na mitihani ya ana kwa ana.
Aidha, Seoul nchini Korea Kusini ilitoa taarifa rasmi mwezi Juni mwaka huu, ikituma notisi kwa shule za msingi na sekondari za jiji hilo pamoja na idara za elimu za maeneo husika, ikipiga marufuku watahiniwa kuvaa miwani mahiri ya AI wakati wa mitihani ya mwisho wa muhula.
