OpenAI bugun (30 iyul) X platformasida post e’lon qilib, ChatGPT for Academic Researchers dasturini ishga tushirganini ma’lum qildi. Dastur doirasida 100 ming nafar tadqiqotchiga ChatGPT’ning ilg‘or funksiyalaridan bepul foydalanish imkoniyati beriladi.
Olimlar OpenAI rasmiy veb-sayti orqali shaklni to‘ldirib, ChatGPT for Academic Researchers dasturiga qo‘shilishlari mumkin. Dastlab dastur ayrim oliy ta’lim muassasalarining 10 ming nafar foydalanuvchisiga taqdim etiladi, kelgusida esa bosqichma-bosqich yana 90 ming nafar tadqiqotchini jalb qilish rejalashtirilgan.
Ishtirokchilar “foydalanish soni cheklovi yuqoriroq va kontekst oynasi kattaroq” bo‘lgan ChatGPT versiyasiga ega bo‘ladi. Bu Pro versiyasidagi GPT-5.6 Sol modelidan foydalanishni qo‘llab-quvvatlaydi. Ushbu versiya murakkab so‘rovlar va uzoq vaqt davom etadigan vazifalar uchun maxsus optimallashtirilgan.
OpenAI’ning yangi dasturiga qo‘shilishga taklif qilingan olimlar o‘zlari bilan bir akademik muassasada ishlaydigan to‘rt nafar hamkasbini taklif qilishlari mumkin. Ushbu tadqiqotchilar ham ayni funksiyalar to‘plamidan bepul foydalanadi.
OpenAI shuningdek, o‘tgan yilning fevral oyida ilk bor taqdim etilgan chatbotning “kengaytirilgan” chuqur tadqiqot funksiyasini taklif qilishni rejalashtirmoqda. Bu funksiya foydalanuvchilar savollariga javob berish uchun yuzlab veb-saytlardan ma’lumot to‘playdi. Tadqiqotchilar esa bu imkoniyat asosida ilmiy jurnallar kabi muayyan manbalardan tadqiqotga oid mavzular bo‘yicha ma’lumotlarni olishni maxsus sozlashlari mumkin.