The Verge nashrining xabar berishicha, Nyu-York shahri meri Zohran Mamdani mahalliy vaqt bilan 2-kuni davlat maktablari darslarida kichik yoshdagi o‘quvchilarning AI’dan foydalanishini cheklashini maʼlum qildi.
Taqiq bir yil amal qiladi va 2026-2027 o‘quv yilidan boshlab joriy etiladi. U 2-K maktabgacha taʼlim guruhidan (izoh: 2 yoshdan bog‘chaga kirishgacha) sakkizinchi sinfgacha bo‘lgan taxminan 600 ming nafar o‘quvchini qamrab oladi. Nyu-York shahri bir vaqtning o‘zida raqamli qurilmalardan foydalanish qoidalarini ham kuchaytiradi va ayrim AI taʼlim vositalarini kichik miqyosda sinovdan o‘tkazadi.
Nyu-York shahar taʼlim departamentining yangi qoidalariga ko‘ra, o‘qituvchilar uy vazifalarini tekshirishda AI’dan foydalana olmaydi. O‘quvchilar yuqori maktabga o‘tishdan oldin darslarda AI’dan foydalana olmaydi, hamrohlik va ruhiy qo‘llab-quvvatlashga asosiy vosita sifatida xizmat qiluvchi chatbotlar esa barcha sinflarda taqiqlanadi.
Yuqori sinf o‘quvchilari AI’dan faqat muayyan holatlarda foydalanishi mumkin. Ular har yili ikki marta AI savodxonligi bo‘yicha taʼlim olib, “qaramlik” paydo bo‘lishidan oldin AI haqida “tanqidiy fikrlash”ni o‘rganadi.
Mamdani bayonotida shunday deyiladi: “Bolalar o‘rganishi va ulg‘ayishi uchun ularga o‘qituvchilar hamda insonlar o‘rtasidagi aloqa kerak. Ular tengdoshlari bilan birga ko‘nikmalarni rivojlantirishi, taʼlim xodimlari bilan munosabatlar o‘rnatishi va murakkab masalalarga mustaqil duch kelishi kerak. Texnologiya sohasi bizni AI asosidagi erta taʼlim nafaqat muqarrar, balki zarur ekaniga ishontirmoqchi. Biz bu fikrga qo‘shilmaymiz.”
Bundan tashqari, uchinchi sinfgacha bo‘lgan o‘quvchilarga shaxsiy ekranli qurilmalardan foydalanishga ruxsat berilmaydi. Nyu-York shahar taʼlim departamenti ekrandan foydalanish vaqtiga oid tavsiyalarni ham ishlab chiqadi. O‘rta maktab o‘quvchilari undan kuniga ko‘pi bilan 45 daqiqa foydalanishi mumkin. O‘qituvchilar darsga tayyorgarlik ko‘rishda AI’dan foydalanishi mumkin. Nogironligi bo‘lgan o‘quvchilar va ko‘p tilli taʼlim oluvchilarga yordam beruvchi AI vositalaridan foydalanishga, shuningdek, informatika darslari kabi muayyan taʼlim maqsadlariga istisno tariqasida ruxsat berilishi mumkin.
Nyu-York shahri, shuningdek, ayrim yuqori maktab darslarida “cheklangan AI sinovi”ni o‘tkazadi. U ko‘pi bilan 5 ta sinfni qamrab oladi. Sinovda ishtirok etuvchi vositalar xavfsizlik va maʼlumotlar maxfiyligi standartlariga javob berishi, shu bilan birga o‘quvchilar asosiy fikrlovchi bo‘lib qolishi taʼminlanishi kerak.
Bungacha Nyu-York davlat maktablarida 2025-2026 o‘quv yilidan boshlab “shaxsiy internetga ulangan elektron qurilmalar”dan kun bo‘yi foydalanish taqiqlangan edi, bunga smartfonlar ham kiradi. Nyu-York maktab okrugi rahbari ushbu darslardagi AI taqiqi AQShdagi eng qatʼiy siyosatlardan biri ekanini bildirdi.