Amazon Twitch jonli efir kontentidan o‘zining AI modellarini o‘qitish uchun foydalanmoqda, biroq Twitch foydalanuvchilari bundan norozi.
Amazon’ga tegishli Twitch mahalliy vaqt bilan chorshanba kuni foydalanuvchilar rad etish opsiyasini tanlashi va shu orqali Amazon o‘z kontentidan AI modellarini o‘qitish uchun foydalanishiga yo‘l qo‘ymasliklari mumkinligini e’lon qildi. Bu e’lon yana bir holatni rasman tasdiqladi: Amazon haqiqatan ham Twitch kontentidan AI modellarini o‘qitish uchun foydalanib kelgan.
Ushbu o‘zgarishlarni tushuntirishga bag‘ishlangan jonli efirda Twitch hamjamiyat rahbari Mary Kish foydalanuvchilar bunga keskin qarshi chiqishini kutayotganini aytdi.
“Bundan xursand yoki hayajonda bo‘lishingizni kutmayapmiz”, dedi u. “Hech kim bunga ijobiy munosabat bildiradi, deb o‘ylamayman.”
Ma’lum bo‘lishicha, u haq edi.
Jonli efirning real vaqt rejimidagi chat oynasi tez orada AI’ga qarshi yuzlab xabarlar bilan to‘lib ketdi. Twitch’ning bir nechta taniqli strimerlari ham X’da chiqish qilib, Amazon Twitch kontentidan AI modellarini o‘qitish uchun foydalanayotganini tanqid qildi. Ular rad etish mexaniztiga ham shubha bildirdi, chunki bu funksiya sukut bo‘yicha foydalanuvchini “roziman” holatiga qo‘yadi.
“Bu funksiyani albatta o‘chirib qo‘yishni va Twitch’ga bunday bema’nilikni xohlamasligimizni aytishni unutmang!” deb yozdi Twitch foydalanuvchisi Legundo X’da.
Twitch’ning bosh mahsulot direktori Mike Minton Amazon ilgari Twitch jonli efir kontentidan AI modellarini o‘qitish uchun foydalangan yoki yo‘qligini bilmasligini aytdi.
“Amazon bu masalada aynan nimalar qilganini, jumladan modelni o‘qitishda qaysi kontentdan foydalanganini va qaysi kontentdan foydalanmaganini bilmayman”, dedi Minton. “Amazon’dagi o‘qitish jarayoniga men mas’ul emasman.”
Kish va Minton ushbu rad etish sozlamasini Twitch’ga xos maxfiylik himoyasi funksiyasi sifatida ta’rifladi. Minton shunday dedi: “Ommaga deyarli barcha ochiq kontent modelni o‘qitish uchun qandaydir shaklda ishlatiladi, bunday foydalanishga ruxsat olingan yoki olinmaganidan qat’i nazar.”
Foydalanuvchilar Twitch maxfiylik sozlamalariga kirib, sahifaning pastki qismidagi slayderni o‘zgartirish orqali AI modelini o‘qitishda foydalanishni rad etishlari mumkin. Minton jonli efirda Twitch subtitrlar yaratish, videolarni montaj qilish va kontentni tasniflash uchun AI’dan foydalanishini, biroq hozircha generativ AI funksiyalaridan foydalanmayotganini aytdi.
Amazon Twitch’ni 2014-yilda sotib olgan.