Phison kompaniyasiga qarashli Yaponiyaning xotira modullari ishlab chiqaruvchisi Nextorage bugun aiDAPTIV Station deb vaqtincha nomlangan tashqi qurilmani ishlab chiqishini e’lon qildi. U atigi 32 GB tezkor xotiraga ega AI noutbuklarida OpenAI GPT-OSS-120B kabi yirik sun’iy intellekt modellarini ishga tushirish imkonini beradi.
Nomidan ko‘rinib turibdiki, Nextorage aiDAPTIV Station Phison kompaniyasining aiDAPTIV texnologik yechimini qo‘llab-quvvatlaydi. U kompyuterning DRAM’i va tashqi yuqori chidamlilikka ega NAND xotira qurilmasi o‘rtasida resurslarni dinamik taqsimlab, amalda tezkor xotira hajmini kengaytiradi. Qurilma portativ dizaynga ega, USB-C interfeysi bilan jihozlangan hamda Windows operatsion tizimi va Linux operatsion tizimining Ubuntu distributivini qo‘llab-quvvatlaydi.
Nextorage aiDAPTIV Station’ni joriy yil ichida Yaponiya bozoriga chiqarishni maqsad qilgan. Kompaniya, shuningdek, unga mos tayyor dasturiy paket yechimini ham rejalashtirmoqda.