OpenAI bosh direktori Sem Altman bir kun kelib sun’iy intellekt oz sonli kompaniya, model yoki shaxslar nazoratiga o‘tib, iste’molchilarning mutlaq ko‘pchiligi texnologiya dunyoni qanday shakllantirishi masalasida ovozga ega bo‘lmay qolishidan xavotirda ekanini aytdi.
“To‘g‘ri yo‘l shuki, odamlar kelajakni chuqur nazorat qila olishini istaymiz,” dedi Altman mahalliy vaqt bilan yakshanba kuni e’lon qilingan David Senra podkastida. “Jamiyat va modellar birgalikda rivojlanadi.”
Altman sun’iy intellekt inson nazoratchilarining kishanlaridan xalos bo‘lishi mumkinligidan ham xavotirda ekanini aytdi. Ajablanarlisi shundaki, uning ta’kidlashicha, ikkinchi ehtimoldan qo‘rqish birinchi ehtimolning ro‘yobga chiqishiga olib kelishi mumkin.
“Ko‘plab odamlar bu xavflarning jiddiyligidan juda tashvishda, bu tuyg‘u ta’sirida dunyoni himoya qilish kerak deb hisoblaydi,” dedi u. “Masalan, bilasizmi, ‘xavfsizlik evaziga katta miqdordagi erkinlikdan voz kechishimiz kerak.’”
Altman, ehtimol, Anthropic bosh direktori Dario Amodeini nazarda tutgan.
Amodei podkastlar, maqolalar va kompaniya blogida sun’iy intellektning tez rivojlanishi keltirib chiqaradigan xavflardan ogohlantirgan. Iyun oyidagi maqolasida Amodei kompaniyaning yangi Mythos modeli kiberxavfsizlik, moliya sohasi, muhim infratuzilma va milliy xavfsizlikka “juda real tahdid” solishini yozgan.
Amodei ushbu ogohlantirishlardan foydalanib, hukumat sun’iy intellektni tartibga solishda katta rol o‘ynashi kerakligini ilgari surgan. Altman nuqtayi nazarida, bu erkinlikni xavfsizlikka almashtirish bo‘lishi mumkin.
Anthropic, shuningdek, o‘tgan oy ochiq vaznli modellarni qo‘llab-quvvatlovchi jamoaviy maktubni imzolamagan yagona yirik sun’iy intellekt kompaniyasi bo‘ldi. Ochiq vaznli modellar ishlab chiquvchilarga sun’iy intellekt modellarini o‘z infratuzilmasida ulashish, yuklab olish, o‘zgartirish va joriy etish imkonini beradi.
Xitoy ochiq vaznli modellarni allaqachon qabul qilgan, bu esa unga Silikon vodiysi bilan juda kam xarajat evaziga hamnafas bo‘lish imkonini bermoqda. AQShdagi ayrim kompaniyalar, jumladan Nvidia, Meta va Microsoft, AQSh ham shunday qilishi kerak, aks holda sun’iy intellekt poygasida o‘z mavqeini raqiblariga boy berishi mumkin, deb hisoblaydi.
OpenAI o‘zining ilg‘or modellarining manba kodini e’lon qilmagan bo‘lsa-da, o‘tgan yili ikkita ochiq vaznli modelni chiqargan: gpt-oss-120b va gpt-oss-20b.
Podkastda Altman, shuningdek, AQShning sun’iy intellekt sohasidagi yetakchilari bu texnologiya odamlarga o‘z hayoti ustidan qanday qilib ko‘proq mustaqillik berishini jamoatchilikka ko‘rsata olmaganini aytdi.
“Biz tarixdagi eng katta kichik bizneslar tashkil etish to‘lqiniga guvoh bo‘lamiz,” dedi u. “Menimcha, bunga sun’iy intellekt turtki bermoqda.”