OpenAI bosh direktori Sem Altmanning “ajoyib” (cool) tushunchasi, aftidan, ko‘pchiliknikidan biroz farq qiladi.
Masalan, uning X’dagi shaxsiy biografiyasida “AI is cool i guess (AI, chamasi, ajoyib)” degan jumla yozilgan. Bundan tashqari, u undagi “i” harfini ataylab kichik harfda yozgan. Ba’zilar bunday yozuv uslubini “ajoyib” deb hisoblaydi, ammo hamma ham bunga qo‘shilmaydi.
Shu hafta Altman X’da ChatGPT’ning o‘zi “ajoyib foydalanish holati (cool use case)” deb atagan yana bir usulni ulashdi. Biroq foydalanuvchilarning munosabati umuman “ajoyib” bo‘lmadi, aksincha, ancha sovuqqon kechdi.
U barcha harflarni kichik yozib, shunday dedi: “Oila a’zolaringiz taqvimlarini bog‘lang va ChatGPT’ga farzandlaringizning so‘nggi qiziqishlarini umumlashtirishga imkon bering.” Shuningdek, bu uning o‘z g‘oyasi emas, balki bu usul haqida boshqalardan eshitganini aytdi.
U misol tariqasida, har kuni ertalab farzandlarini maktabga olib borayotganda, ChatGPT’dan bir farzandining o‘sha kuni tushdan keyingi futbol o‘yini, boshqa farzandining yaqinlashayotgan tug‘ilgan kuni va ayrim yangiliklar haqida podkast tayyorlashni so‘rash mumkinligini aytdi.
Bu g‘oya so‘nggi yillarda tobora ommalashayotgan tendensiyani, ya’ni farzand tarbiyasi yukini kamaytirish uchun AI’dan foydalanishni aks ettiradi. Altmanning o‘zi ham bu g‘oyani qariyb bir yildan beri faol targ‘ib qilib kelmoqda.
2025 yilda Altman turmush o‘rtog‘i Oliver Mulherin bilan o‘g‘illi bo‘ldi. U ilk bor ota bo‘lgan dastlabki oylarida ChatGPT ajralmas yordamchi bo‘lganini bir necha bor ta’kidlagan.
Biroq ko‘pchilik uchun AI’ni hayotning har bir lahzasiga, ayniqsa ota-ona va farzand birga o‘tkazadigan vaqtga kiritish unchalik ma’qul fikr emas.
Disney’ning “Gravity Falls” animatsion seriali yaratuvchisi Aleks Xirsh izohlar bo‘limida shunday deb yozdi: “Nega shunchaki o‘z farzandingiz bilan gaplashmaysiz?” Ushbu izohga berilgan layklar soni Altmanning asl posti olgan layklar sonidan taxminan 10 baravar ko‘p bo‘ldi.
Shundan so‘ng X’dagi yuzlab foydalanuvchilar ham muhokamaga qo‘shildi. Ulardan biri shunday izoh qoldirdi: “Haqiqiy insoniy muloqotni AI bilan almashtirish — AI’dan foydalanishning eng yomon usullaridan biri.”
Bu fikr OpenAI prezidenti Greg Brokmanning qisman roziligiga ham sazovor bo‘lganga o‘xshaydi.
U shanba kuni X’da e’lon qilgan posti ham keng e’tibor qozondi. Uning aytishicha, kompaniya xodimlari ChatGPT ulardan biror ishni bajarishni so‘raganini yoqtirmaydi, garchi xuddi shu iltimosni hamkasblari bildirsa, ular “buni bajonidil qilishga tayyor”.
U ham barcha harflarni kichik yozib, shunday dedi: “Bu odamlar insonlar o‘rtasidagi munosabatlarni juda qadrlashini va bir-biriga yordam berishga tayyorligini yana bir bor ko‘rsatadi. Ular AI vaqtlarini tejashiga yoki insonlar o‘rtasidagi muloqot tajribasini yaxshilashiga umid qiladi, odamlar o‘rtasida to‘siq bo‘lishiga emas.”
Biroq AI yordamida farzand tarbiyasini qo‘llab-quvvatlash tarafdori bo‘lgan ota-onalar uchun vaqtni tejash eng dolzarb ehtiyojdir.
Ikki farzandning onasi Hally Pek Business Insider’ga bergan intervyusida ish jadvali, maktab rejalari, darsdan tashqari mashg‘ulotlar, tug‘ilgan kun eslatmalari va farzandlarga g‘amxo‘rlik qilish bilan bog‘liq turli vazifalarni boshqarish uchun AI yordamchisidan foydalanishini aytdi.
U shunday dedi: “Mening ikki farzandim bor, erim ham to‘liq stavkada ishlaydi. Ikkalamizning ham ishimiz juda band, shuning uchun vaqt bizning eng qimmatli resursimizdir.”
Altman avvalroq amerikalik boshlovchi Jimmi Fellon bilan suhbatda, ChatGPT bo‘lmaganida yangi tug‘ilgan chaqaloqqa qanday qarashni tasavvur ham qila olmasligini aytgan.
U ChatGPT’dan chaqaloqning o‘sishi va rivojlanish bosqichlari, shuningdek, farzand tarbiyasiga oid kundalik masalalar haqida ma’lumot olish uchun tez-tez foydalanishini aytdi.
Altman kelajakda o‘z farzandi AI’dan foydalanishni o‘rganib, “bugungi odamlarnikidan ancha yuqori qobiliyatga” ega bo‘lishini, garchi ular “hech qachon AI’dan aqlliroq bo‘lmasligini” ham ta’kidlagan.
Meta AI rahbari, Scale AI asoschisi, 29 yoshli Aleksandr Vang esa yanada radikal g‘oyani ilgari surdi. U Neuralink kabi miya-kompyuter interfeysi texnologiyalari yetarlicha rivojlangandan keyingina farzand ko‘rish haqida o‘ylashi mumkinligini aytgan. Uning fikricha, bolalar miyasi kuchli neyroplastiklikka ega, shu bois ular bunday texnologiyalarga yoshligidan moslasha oladi va oxir-oqibat superintellekt tizimlari bilan hamohang fikrlaydi.