Sinxua agentligining bugungi xabariga ko‘ra, Birinchi Milliy Yoshlar sun’iy intellekt tanlovi finali 1-avgust kuni Shanxayda boshlandi. Xitoyning 31 ta provinsiyasi (avtonom hududi va markazga bo‘ysunuvchi shahri), Shinjon ishlab chiqarish-qurilish korpusi, shuningdek Gonkong va Makao maxsus ma’muriy hududlaridan kelgan 850 nafardan ortiq ishtirokchi 46 ming nafar qatnashchi orasidan saralanib, Shanxayda yakuniy bellashuvda ishtirok etmoqda.
Ta’lim vazirligi tomonidan tasdiqlangan “2025–2028 o‘quv yillarida boshlang‘ich va o‘rta maktab o‘quvchilari uchun mo‘ljallangan milliy tanlov tadbiri” sifatida Birinchi Milliy Yoshlar sun’iy intellekt tanlovi Xitoy farovonlik jamg‘armasi va Xitoy Ayollarni rivojlantirish jamg‘armasi tomonidan birgalikda tashkil etildi. “Ezgulikka yo‘naltirilgan intellekt cheksiz rivojlanadi” mavzusidagi tanlov ijtimoiy foydalilik, me’yoriylik va ommaboplik tamoyillariga amal qiladi. Uning maqsadi “sun’iy intellekt + ta’lim” integratsiyasini chuqurlashtirish, “iste’dodlarni saralash, ko‘nikmalarni rivojlantirish va salohiyatni shakllantirish”ni birlashtirgan yoshlar uchun SI sohasidagi innovatsiyalar va ijodkorlik platformasini, shuningdek sun’iy intellekt bo‘yicha ilmiy savodxonlikni rivojlantirish va bilimlarni ommalashtirish platformasini yaratishdan iborat.
Finalda sun’iy intellekt asoslari bo‘yicha bilimlar tanlovi, sun’iy intellekt vositalaridan foydalanish tanlovi, sun’iy intellekt yordamida ilmiy tadqiqot tanlovi, mujassamlangan intellekt tanlovi va katta til modellaridan foydalanish tanlovi kabi 5 ta ilg‘or yo‘nalish tashkil etildi. Ular ishtirokchilarning tushunish va anglash, vositalardan amaliy foydalanish, fanlararo izlanish hamda ilg‘or texnologiyalarni integratsiya qilishgacha bo‘lgan ko‘p bosqichli qobiliyatlarini har tomonlama baholaydi.
Tanlov sun’iy intellektdan keng foydalanish masalasiga alohida e’tibor qaratib, Shanxay homiylik qiladigan hududlar va kam rivojlangan hududlardan 60 nafardan ortiq o‘quvchini finalni tomosha qilish uchun Shanxayga taklif etdi. Ular Yoshlar sun’iy intellekt karnavali kabi o‘quv tadbirlarida ham ishtirok etadi.
Uch kunlik final davomida tanlov tashkiliy qo‘mitasi “Ta’lim va tadqiqot seminari”, “Ta’lim, ishlab chiqarish va tadqiqotni integratsiyalash seminari” kabi mavzuli tadbirlarni ham o‘tkazadi. Sun’iy intellekt sohasi ekspertlari va olimlari, soha vakillari, boshlang‘ich va o‘rta maktab direktorlari hamda o‘qituvchilari yoshlar uchun SI ta’limining yangi yo‘llarini birgalikda izlaydi, sun’iy intellekt bo‘yicha ilk ta’lim va umumiy savodxonlikni rivojlantiradi.